आपस की बात सुनें । apas ki baat sune ।

बघेली पर्यावरण गीत हेरे मिलै नहिं पीपर बहेरा मनई के जीबन मा होइगा अँधेरा हेरे मिलै नहिं अब पीपर बहेरा न आमा बगैचा न तेंदू न महुआ नहीं अब खरहरी न हर्रा न कहुआ। न चिरई चनूँगुन के खोंथइला बसेरा। हेरे मिलै नहिं अब पीपर बहेरा। न सालैं न गुँइजा न छुइला न सगमन। जामुन खम्हार नहीं न बीही न सहिजन। करौंदा बरारी अउ न बइरि मिलै हेरा। हेरे मिलै नहिं अब पीपर बहेरा। सीसम न नीलगिर सेमर न खैरा। कैथा न इमली बेल सेहेरुआ सजैरा। न चंदन चचेंड़ा न चिरुल चार चेरा।  हेरे मिलै नहिं अब पीपर बहेरा। सताबर पसारन न गुरिज अस्सगंधा। पेंड़ काट मनई बनाय लिहिस धंधा। बेंचि-बेंचि पेंड़न का बनाये है डेरा। हेरे मिलै नहिं अब पीपर बहेरा। एहिन के कारण आजु बगरा प्रदूषन। हेरत फिरैं सब आजु शुद्ध आक्सीजन। मरा रोइ-रोइ चाहे मूड़ का कचेरा। हेरे मिलै नहिं अब पीपर बहेरा। अबहूँ भरे भरे मा चेता बिरछा लगाबा। नाहक मा देखा खुद के नास ना कराबा। पइहा न हेरे कहौं जंगल-पतेरा। हेरे मिलै नहिं अब पीपर बहेरा। प्रकृति के कहर का माधव समझा न रोग हो। मनई के तन पा के रचा न कुजोग हो। अबहूँ भरे मा जागा करा न अबेरा। हेरे मिलै नहिं अब पीपर बहेरा। अशोक त्र...